مقابلة مع الاولى على فلسطين

- مقابلةمع الطالبة تالة باسم قاسم باطية الأولى ع الوطن للفرع العلمي بمعدل 99.7% تالة كانت بمدرسة طلائع الأمل الثانوية نابلس حتى نعرف ونسمع من الاولى ع فلسطين والاوائل بشكل عام تفاصيل حياتهم الدراسية اللي عاشو وقدرو يوصلو ويجيبو معدل يرفعو فيه راسهم وراس أهلهم وصحابهم طول العمر و الاسئلة اللي سألناها اياها كانت : 1- شو شعورك لما عرفتي النتيجة ؟ أوصفيلنا الموقف ؟ * كتير فرحت ، وما كنت مصدقة ولهلأ مش مصدقة وكل اللي حولي فرحانين اكتر مني . 2- مين اول واحد حكالك مبروك وهناك ؟ * مرة عمي . 3- نتيجتك هادي هي اللي حددت معدلك ولا انتي كنتي مخططة من قبل شو ناوي تدرسي ؟ * كنت ناوية شو بدرس بس النتيجة عززت أكتر وشجعتني أكتر وراح أدرس طب . 4- بأي جامعة راح تدرسي ؟ * بالجامعة الاردنية او النجاح . 5- لما طلعت النتيجة هيك شو أول طلب طلبتي من اهلك ؟ طلبتي شي محدد ولا كان الاشي عفوي هيك ؟ * ما في شي محدد ، مع انو بابا حكالي شو مبدك اطلبي ، بس انا ما بدي شي . 6- المعدل العالي بالتوجيهي نعمة ولا برأيك العكس " نقمة " ؟ * أكيد نعمة ، بس سلبي ممكن انو عشان بحير الواحد ، بس اكيد ايجابي اكتر وكلها بتهون بفرحة النجاح. 7- مادة التوجيهي برأيك بتعتمد ع الفهم او الحفظ كـ طالبة علمي ؟ * فيها فهم وبرضو فيها حفظ ، لأنو المناهج الفلسطينية فيها مواد مشتركة بين العلمي والادبي 8- شو أكتر مادة تغلبت فيها ؟ * الادارة 9- كم جبت فيها ؟ * 100% 10- في 3 علامات راحو من معدلك وينهم ؟ * علامة بالكيميا وعلامة تعبير بالانجلش وعلامة تعبير بالعربي . 11- لمين بترجعي بالفضل انك جبتي هاد المعدل العالي ؟ * الفضل لله اولا ، وكمان لمدرستي ومعلماتي وجهودهم معانا . 12- شو الحافز اللي خلاكي تجيبي هيك معدل وتصبري واتضلي للأخر ؟ * انو كنت بدي أجيب الاولى هو كان أكتر حافز ، وكان هاد طموحي من اول السنة . 13- كنتي اتضلي للساعة 2 تدرسي وتقومي الصبح بدري تكملي ؟ كيف كان نظامك بلدراسة ؟ * لأ السهر ابدا ، 9 ونص كنت انام واقوم الصبح بدري قبل الفجر بساعة اصلي واقرأ قرآن وبعدها ابدا أدرس . وأحسن وقت دراسي كان بالنسبة الي من الفجر للعصر 14- كم كان معدلك بالمدرسة ؟ بالامتحان التجريبية بالمدرسة ؟ * النهائي بالمدرسة 98.7% وبالتجريبي 99% . 15- كنتي تستعيني بنماذج اسئلة سنوات سابقة ؟ * كتير ، أكتر شي للطالب واهم شي لازم يحلهم سنوات سابقة واسئلة الوزارة . 16- شو تقييمك لمستوى أسئلة الامتحانات بالتوجيهي هاي السنة ؟ * اكيد ، ما كان سهل ، بس اي حدا دارس بنجح . 17- كان عندك ضغط نفسي بالنسبة للمعدل اللي لازم تجيبي بالتوجيهي ؟ ولا كان الاشي هاد يعطيكي دفعة معنوية ؟ * لا كان يعطيني دفعة معنوية وما كنت مضغوطة . 18- تقييمك لمرحلة التوجيهي بعد مخلصتي منها ؟ * رحلة حلوة . 19- بالعطلة الصيفية اللي قبل التوجيهي ، كنتي تاخدي دورات ؟ الها فايدة ؟ * أه ، أخدت فيزيا كيميا و رياضيات ، وكل واحد بشوف المناسبو ، بس انا بالنسبة الي حسيت انو الواحد بس ياخد دورات برتاح نفسيا ، انو يعني يكون بالعطلة ومش عامل شي وعليك توجيهي بكون متدايىء. 20 - كيف كانت نفسيتك قبل متفوتي على الامتحان ؟ * اخر 5 ايام كنت استنى الوزاري ، كانت اعصابي مشدودة ، مش خوف بس كان الو رهبة شوي . 21 - كنت تملي من كتر الدراسة والضغط ؟ * في اوقات اه . 22 - وانت بتجاوبي ع اسئلة الامتحان ، كنتي توصل لدرجة انك خلص بدك تطلعي وتسلمي الورقة وتخلصي ؟ * كنت اخلص بنص الوقت دايمن ، بس نص الوقت التاني كنت اراجع وأسلم اخر وحدة . بس بامتحان الكيميا استعجلت شوي وسلمت بدري وخسرت علامة . 23 - بوقت امتحانات الوزارة كم ساعة كنتي تدرسي ؟ * تقريبا ع 2 الضهر أكون مخلصة . 24 - لازم تحفيز من الاهل ولا هي شغلة ذاتية بالطالب عشان ينجح ويتفوق ؟ * الأغلب ذاتية ، مع انو أهلي كانو يساعدوني بس ما كانو يحكولي انو بدنا اتجيبلنا من الاوائل وهيك . 25 - لما تيجي تنامي بتحسي انو كان يومك متعب ولا كان يوم دراسي عادي ؟ بتحسي انك مرتاحة ودارسة ؟ * كنت انام دايمن على الكتاب ، ع 9 ونص انام وبتزكرش اني حلمت طول فترة التوجيهي . 26- الدور الاساسي للنجاح بالتوجيهي بيعتمد ع الطالب ولا ع الاستاز ؟ * بالتعاون بين التنين ، الاستاز بوفرلنا كل الافكار والمطلوب ، بس الطالب ازا ما درس هي وقلتها واحد . 27 - وانتي بتقدمي بالامتحان ، كان يجيكي سؤال ما تعرفي ، كيف كنتي تحافظي ع تركيزك وتحاولي تحلي ؟ * اه بامتحان الانجليزي والاحياء اجاني سؤال ما عرفت أحلو ، اول شي كنت اعملو أعد العلامات عليهم وبعدين اطلع ع البنات واقول لحالي لا هاد طبيعي طبيعي ، وأحاول قد ما بقدر أكتب أكبر كم . 28- وانتي رايحة ع قاعة الامتحان ، كنت تمسكي الكتاب وتراجعي بالطريق وانتي ماشية ؟ * اه بس منظر ، ما بحب اراجع وانا رايحة ع الامتحان ، بس مش معقول ومش منظر الواحد يكون رايح هيك . 29 - بتشوفي انو هاي السنة كانت أصعب من السنوات الماضية ؟ سنة 2009 ؟ * اه أصعب من 2008 و 2007 بس مفروض التوجيهي يكون هيك . 30 - حاولتي تغش بالامتحانات او تغششي ؟ * لا مستحيل ، الوضع بقاعات الوزاري بكون منضبط . 31 - كنتي تطلع من البيت ؟ كانت الحياة الاجتماعية عندك موجودة وتمارسيها وهواياتك بشكل طبيعي ؟ * خلال السنة طبيعي ، وكل خميس الا ما أطلع ، بس بفترة امتحانات الوزارة لأ . 32 - شو الظروف والعوامل الايجابية بحياتك اللي خلتك اتجيبي هيك معدل ؟ * الفضل لله اللي وصلني لهاي الرحلة ، ويمكن لأني كل امتحان كنت أدرسو كأنو امتحان وزاري وأراجع اخطائي وأعالج أغلاطي أول بأول طول السنة . 33 - لما كنت تنضغطي وتحسي حالك مش قادرة تدرسي ، شو كنتي تعملي ؟ * بترك لكتاب اول شي ، وحسب المزاج ازا كان جاي ع بالي اطلع او امشي او قراءة القران . 34 - كنتي تستعيني بمواقع الكترونية تعليمية ؟ و كنتي تحلي اسئلة من المساعدات الخارجية ؟ * لا بالمرة لأنها بتضيع الوقت ، بس بالعطلة الصيفية كنت أنزل اسئلة ، باقي السنة لا . لأنو لما يشتغل الكمبيوتر وافتح وادور بدو نص ساعة وهاي أولى ادرس فيها شي تاني من الكتاب. و ايام الجمعة والسبت كنت أحل اه . 35 - يوم نتيجة التوجيهي رحتي اتجييبها انتي من المدرسة ولا قعدتي اتدوي عليها من الانترنت ؟ * رحت ع المدرسة وعرفت من المدرسة لما سمعت الخبر . 36 - شو بتوجهي كلمة هيك نصائح لطلاب التوجيهي ؟ * ادرسو منيح وحطو الهدف قدامكم وادرسو كل امتحان كأنو امتحان وزاري . 37 - لو الأهل ما ساعدو الطالب حتى لو كان متفوق ومجتهد ، ممكن يجيب هيك معدل ويكون زي مبحلم ؟ * اه ممكن ، بنظري انو اللي بدو يتفوق بحول الظروف السلبية اللي حوليه لأيجابية وبيقدر . 38- شو رأيك بطلاب غزة ؟ ما شاء الله عليهم ، قلوبنا كانت معهم ، وما اتخيلت انو ممكن يطلع منهم اوائل ، بالظروف اللي عاشوها وبيننا احنا انو المعاناة بتولد الابداع . 39 - شو كلمتك لـ فلسطين ؟ * الله يعينا انو نرفع وطنا لأعلى شي بعلمنا ، ونقدر نبني ونرجعو النا . منقول للفائدة وبهيك ختمنا المقابةمع تالة باطية الاولى على الوطن فلسطين بمعدل 99.7% بالفرع العلمي

:king:

شكرا لكي اختي
انشاء اللة ربنا بجعلنا من المتفوقين متلها

يسلمو حبيبتي